مصطلحات عامية سودانية

[هاشم عبد الكريم]

ألكع أفتحو بِسراع قبال ما نبقالو طُرُش فى الزفة !!!

عليك الاسراع بفتح الصفحة الخاصة بموضوع الكلمات الجديدة المستعملة فى السودان (لُغة الرندوك ) قبل ان يكون حالنا كحال الاطرش الماشى فى زفة العرسان وما عارف القوّل فى شنو )

 

[هاشم عبد الكريم]

(الله يكفينا شر الصلبته والدخول بين القشرة والثمرة) الترماج :قطار قديم وافتكر هو التُرام ،قطار داخلى بالعاصمة .
الاسكلا : الميناء (من الأسكلا وحلا )
الكمُسارى ماديرة شرح غير ان الصفارة والطربوش ترتبط به ،
شيتكم ده خباروا موتام ، لا فيهو مسطريمة لا قِده لا طالوش لا بربيت لا ترويسه لا حمار لا سقاله لا عفريته مالو؟ ويوميتو قُوال وله مقطوعيه ؟؟

الترماج ياهو تمام (سمعنا بيه ووصفوه لينا ولم نُحظى بالفُسحة عليه)
الاسكلا :الميناء النهرى
وباقى حاجات البناية نضيف عليهم :الشعبة ،الأمينة،المِرق،والرصاص ونتحرى المهندسين والجنزرجية عُقب ما يودونا التُمنة .ونروح شمار فى مرقه

 

[هاشم عبد الكريم]

الكماشه، اما الكماشه يمسك بها الاناء وهو في النار...لكن مامتاكده صححوني لوكنت غلطانه... .

الكماشة التى يمسكوا بها الإناء فى النارلاتكون إلا فى حالة يكون النجار أو النقُلتى أو الحداد وواحد منهم طابخ القطر قام وما معاه قماش ،فى الحالة دى يستخدم الكماشة لحمل الحلة الحارة، ولو انه توجد هنالك اداة لحمل الحلة وهى حارة ولكن لا أظن ان اسمها الكماشة ونحنا ما خابرِنها ، ( شاوروا اخونا فلة ياناس الرياض )

​

​

​

 

[ودريا]

يحكي انه ايام الحكم الانجليزي جاء احد المواطنين يطلب اجازة لزيارة اهله بعد غياب وقوبل ذلك بتعنت صاحب العمل فما كان منه الا ان اتجه للقاضي الانجليزي وحينما دخل عليه قائلا :
بهائم ود البرجوبه لمن في جرفي عدمنوا الاسكه .
وهنا التفت القاضي للمترجم السوداني ماذا يعني هذا الكلام ؟
المترجم قال ليهو الزول ده قال ليك في اجازة ؟
القاضي قال ليهو No

 

[توحيده لطفي احمد سعد]

الاخ هاشم كلامك صح 100% انا في الاول كنت فاكره الكماشه تستمل لحمل الاناء وهو في النار حينما يكون الاناء من غير يد ،وبعد ذلك عرفت حينما صححني ذوي الاختصاص ان الكماشه تستعمل كما ذكرت واشكرك على التصحيح اخي هاشم...وفي انتظار المزيد.

 

[هاشم عبد الكريم]

يحكي انه ايام الحكم الانجليزي جاء احد المواطنين يطلب اجازة لزيارة اهله بعد غياب وقوبل ذلك بتعنت صاحب العمل فما كان منه الا ان اتجه للقاضي الانجليزي وحينما دخل عليه قائلا :

بهائم ود البرجوبه لمن في جرفي عدمنوا الاسكه .
وهنا التفت القاضي للمترجم السوداني ماذا يعني هذا الكلام ؟
المترجم قال ليهو الزول ده قال ليك في اجازة ؟
القاضي قال ليهو no

شكرا اخونا العزيز المهندس ود ريا على مشاركتك الثرة ،ونتمنى ركوبك القطار معنا دائماً،ما قلته بإختصار هو ذكاء المعرفة المُدعم بالفطنة للسلف فى فهم البعيد ،ولكننا لسنا مثلهم ولكن سنحاول،فعدم منح الاجازة معروف للقاضى و المترجم ، وهما لا يعرفا شخصاً باسم ود البرجوبة وهى الطين اللزج الاسود ،إشارة للطين أصل الانسان فهنا شخص مُبهم،وبهائمه وجدت الفرصة فى دخول الجرف الغير محروس واكلت الزرع وخربت المتاريس والحفر والسرابات ،ولمم تترك شىء لغياب (إنسان )المالك والحارس ،فحوجته للذهاب لهناك لاصلاح الحال وهو المطلب الذى فسره واختصره المُترجم بالإجازة وأوجز القاضى حكمه السريع بالنفى فوراً.والله أعلم .

 

[هاشم عبد الكريم]

الاخ هاشم كلامك صح 100% انا في الاول كنت فاكره الكماشه تستمل لحمل الاناء وهو في النار حينما يكون الاناء من غير يد ،وبعد ذلك عرفت حينما صححني ذوي الاختصاص ان الكماشه تستعمل كما ذكرت واشكرك على التصحيح اخي هاشم...وفي انتظار المزيد.

ولك الشكر ايضا اختنا الكريمة للمتابعة ،ولكن ناس الكوره عندهم إستعمال لكلمة الكماشة فى خطط كرة القدم ،ونترك اهل الشأن يفسروها لينا بدل ما يحسبوها علينا مخالفة سارق

 

[صديق حسن الأمين]

مشكورة سلوى على تلك الاكلات الشهية وزي ما بقولو بليلة مباشر ولا ضبيحة مكاشر

لتكمل ليك المثل ببليلة مباشر لازم تكتب ليك قصة اولادها مع (الويكاب) بعد تفسيره وطبخه

 

[صديق حسن الأمين]

الكرارك هى اعواد الاشجار بعد قطعها وبترها وتستعمل فى بناء الرواكيب

التيت اخوى باقيلى إت زول زراعة كارب المدودهك فى الغُربة شنو؟
حبابك تانى وأمسك عليك دى وكتِر عليها:
الكِشيب : ما تبقّى في الزرع بعد الحصاد من حبوب أو قناديل يراجع جمعه وغربلته المساكين أو صاحب الزرع نفسه.

 

[صديق حسن الأمين]

كان (علبت) (الوناسة)(وتاوقت)في(نفاج)(البوست)(الليلنا)كان عرفتنا
لك الود اكرر دعوتك للبوست الخاص بهذا الموضوع

النفاج : باب المحنه الكان زمان بين الجيران دون إستئذان

 

[صديق حسن الأمين]

أم دقوقه وما أدراك ما أم دقوقه !!
نتمنى من الدكتورة عائشة والدكتورة تماضر يُحدثونا عن أم دقوقه وياريت كمان ويلقوا لينا الضوء عن أخر ما توصل له العلم بخصوص هذا المصل الهام !!!:ansmile09:

ود الحبر هوى!! اسألهن من البصيرة ام حمد كان ما حذفوها من المُقرر،

 

[صديق حسن الأمين]

اخواني اسألكم في واحد منكم قعد مع الوالده جنب الصاجن وإستناها لمن عاست "اللُقمه" وأدتو "الشيط"والشيط ده باقي العجين البكون ماسك في الصاجن بعد ما الوالده تتطلع "اللُقمه"وهو بكون زي الكسره رهيفه ولكنو اتقل وانشف شويه.

ومنها جاء اسم الشيطة المعروفة بالجريف غرب

وإضافة :
الكُورارة :وهم ماتبقى من الكسرة فى طرف الصاج (الفتات)

 

[عبدالله التيت]

التيت اخوى باقيلى إت زول زراعة كارب المدودهك فى الغُربة شنو؟
حبابك تانى وأمسك عليك دى وكتِر عليها:
الكِشيب : ما تبقّى في الزرع بعد الحصاد من حبوب أو قناديل يراجع جمعه وغربلته المساكين أو صاحب الزرع نفسه.

مازول زراعة لكن كترة الونسة و(النِقة )مع ناس الزراعة علمتنا حاجات كتيرة.
كدى شوف لينا الادوات دى
السلوكة ، الشادوف ، التقنت ، السَراب ، الملُوت ، المنجل .

 

[صديق حسن الأمين]

البُرمة : بضم الباء هو الزير الذى نشرب منه الماء وهو مصنوع من الفخار

والدووانه :إنا من الفخار يشبه الزير الكبير من الفخار ايضاً

 

[عبدالله التيت]

بمناسبة الزراعة ياصديق
الفدان فيهو كم متر؟
وكذلك الحبل فى الزراعة ؟
بسمع الناس يقول ليك عندى عشرة حبال !

 

[صديق حسن الأمين]

القصيدة منقولة بالنص الذي شارك عبد الله محمد عبد الدائم اليوم في مكان اخر
ولارتباط بعض الجمل والكلمات الواردة فيها بهذا البوست
نرجو من المتداخلين استخراج هذه الجمل والكلمات ؟ حتي يتمكن اخرون من الاجابة عليها
..

القصيدة رصينة تب، (عُقب من تالاى وقفت الكاشف أخوى مايفسر إلا ننطُر ونسمع جنى ود خيرى ،وإيهاو سيد القول فى النضِم الهولو)

 

[صديق حسن الأمين]

مازول زراعة لكن كترة الونسة و(النِقة )مع ناس الزراعة علمتنا حاجات كتيرة.
كدى شوف لينا الادوات دى
السلوكة ، الشادوف ، التقنت ، السَراب ، الملُوت ، المنجل .

الونسه سمحة ولكن نقة المزارعين دائما مع ناس الضرائب .نشوف ليك طلبك ونحن ناس صف إنتباه ويمين دور قبال ما يجو مهندسين الزراعة يدورونا شمال :
السلوكة :آلة زراعة خشبية طويلة سنينة من قدام بها خشبة جانية للرجل للضغط على الارض عند الحفر وتشخدم لزراعة الزرة .
التقنت:عمل حاجز من التراب حول حوض الزرع لحفظ مياه الرى .
الملوت :هو الملود آله حديدية حادة بمقبض خشبى تستخدم لتنظيف الارض المزروعة من الحشائش والنباتات الضارة .

المنجل:آلة حديدية حادة صغيرة الحجم مقوسة تستخدم لحش القش او البرسيم للدواب وتنظيف الاشجار الصغيرة وتنظيف النخيل ايضا.
السراب :الصفوف المرتبه من الجداول الصغيرة فى المزرعة .
والشادوف والساقية وشغلات السقاية الفرصة لاهل الاختصاص حتى تعم الفايدة .
​

 

[عبدالله التيت]

الونسه سمحة ولكن نقة المزارعين دائما مع ناس الضرائب .نشوف ليك طلبك ونحن ناس صف إنتباه ويمين دور قبال ما يجو مهندسين الزراعة يدورونا شمال :
السلوكة :آلة زراعة خشبية طويلة سنينة من قدام بها خشبة جانية للرجل للضغط على الارض عند الحفر وتشخدم لزراعة الزرة .
التقنت:عمل حاجز من التراب حول حوض الزرع لحفظ مياه الرى .
الملوت :هو الملود آله حديدية حادة بمقبض خشبى تستخدم لتنظيف الارض المزروعة من الحشائش والنباتات الضارة .

المنجل:آلة حديدية حادة صغيرة الحجم مقوسة تستخدم لحش القش او البرسيم للدواب وتنظيف الاشجار الصغيرة وتنظيف النخيل ايضا.
السراب :الصفوف المرتبه من الجداول الصغيرة فى المزرعة .
والشادوف والساقية وشغلات السقاية الفرصة لاهل الاختصاص حتى تعم الفايدة .
​

كفيت وأوفيت
ماقصرت اخ صديق لك الشكر والتحايا

بمناسبة الزراعة ياصديق
الفدان فيهو كم متر؟
وكذلك الحبل فى الزراعة ؟
بسمع الناس يقول ليك عندى عشرة حبال !

 

[سلوى حسن جمبو]

التَرويصة
القِده
والشنِيشة
والسِقاله
والحُمار
اب َراسين
والعَتله
القِمطة
والخَفجة

(شيتكم ده خباروا موتام ، لا فيهو مسطريمة لا قِده لا طالوش لا بربيت لا ترويسه لا حمار لا سقاله لا عفريته مالو؟ ويوميتو قُوال وله مقطوعيه ؟؟

وباقى حاجات البناية نضيف عليهم :الشعبة ،الأمينة،المِرق،والرصاص ونتحرى المهندسين والجنزرجية عُقب ما يودونا التُمنة .ونروح شمار فى مرقه

حصر لقليل من أدوات ومُصطلحات البناء ،قُدمت الطلبات من الصفحة الأولى ،والمهندسين والمقاولين والبنائين والطُلب وأصحاب المغالق عاملين ما سامعين ام أسعار قيمة تمليك المعلومه غير كافية ؟؟؟؟؟؟
تقديم الدعوة من جديد وبارك الله فى من تعلم وعلم ،

 

[صديق حسن الأمين]

بمناسبة الزراعة ياصديق
الفدان فيهو كم متر؟
وكذلك الحبل فى الزراعة ؟
بسمع الناس يقول ليك عندى عشرة حبال !

بعد السلام عليكم جميعاً،
زماااااااان يا اخوى عبدالله الفدان كان فيه :4046.86 متر مربع وما عارفه الزمن دا كمهو!! كان ما بقى إنقاية !!!
أما الحبل فقياس بلدى قديم وخاص بزراعة الجزر والاراضى النيليه وهو تقريبا يقُاس بالشبحة العادية للفرد يعنى تقريبا تعادل يارده
وانواع الحبال (زمان):
تُمانى :ثُمانى 4 خطوات = حبل =3.75 متر تقريباً
عُشارى(ما تُمساح):5 خطوات = حبل 4.7 متر تقريبا،