حبوبه وحبوبه

[ودريا]

مرا كبيييييرة ومشلخة مطارق
راقدة في عنقريب
تحت العنقريب في ابريق وعلبة دهن كركار
في ايدها في سبحة
تسبح ساااااي
واغلب حبوبات زمان العشاء بتاعن عبارة عن رغيف بي لبن
تاكل الرغيف باللبن ده وتمصمص خشمها وتشرب ليها شويه مويه وتخش في الاحاجي ..
حبوبات زماان كلهن حافظات الاحاجي
لازم كل يوم بالليل الاطفال قبل ماينوموا يسمعوا حجوة
وكل يوم حجوة جديدة التقول اسامة انور عكاشة
الحجوة زي الحصة مليانة قيم جميلة وشجاعة ومرؤة
حبوبة زمان حنينة وتربية مية المية لافيها شق لا طق
دي حبوبه زمااااااااااااااان
حبوبه الزمن ده اتغيرت
تلبس احدث الثياب وتسمع تامر حسني
علي الطلاق حبوبات الزمن ده فيهن واحدات بسمعن راغب علامة وتامر حسني
حبوبه الزمن ده يعميهن من الاحاجي
غايتوا لو الشافع عصر عليها شديد
بتحكي ليهو قصة مهند ونور
تجيب ليهو فاطمة السمحة والغول من وين ؟
والله دي لو سمعت سيرة الغول تقول ليك ياااي غول عديل كدة.!!!!
سجم خشمي
حبوبه الزمن ده عندها صفحة في الفيس
حبوبه الزمن ده مابتعرف تعوس
الخدرة دي الشكيه لي الله مابتعرف تورقا
لكن بتعرف تلعب حريق
والله تجرك خمسين زي السلام عليكم
لو جدعت ليها تريس تجرك بيهو
والجوكر بايظ كمان !!!
الشكيه لي الله التجضم ده مابعرفنوا
الشافع لو غلط مابتعرف تجضموا
لكن بتجضم ليك النقة زي الترتيب
نيهاااااو
زين وام تي ن وسوداني حرقن جيبونا ...
وحرقن اصالتنا وكشفن حاالنا ....

 

[BADR ELSIR]

تغير الحال ودوام الحال من المحال....
لماذا تغيرنا ياود ريا...؟؟؟؟
هل العصر يتطلب هذا ؟
ام أن ثقافتنا ثقافة هشه وضعيفة؟؟؟
هل هو عصر العولمة؟؟؟
ينبغى على الحبوبات يكونن عصريات؟؟؟
لكننى أرى مثلما قالوا لكل زمان رجال
أيضا لكل عصر نساء... وحبوبات عصريات
ولك الف تحية

 

[ودريا]

شاكر جدا مرورك الذي بمثابه تاج فوق رأسنا
دكتور بدر الدين
نعم دوام الحال من المحاال
نتمني عودة حبوبه زماان
ماضروري تخت جنبها الكركار
لكننا نبحث عن الاصالة وتربيه الابناء علي مكارم الاخلاق
وهذه الصفات لانستقيها الا من الحبوبات .

 

[احمد الحبر]

لكل شي اذا ما تم نقصان يا ودريا *** فلا يغرك بطيب العيش انسانُ
هي الأيام كما شاهدتها دول *** من سره زمن ساءته أزمانُ ..

​

 

[um rayan]

دوام الحال من المحال والحمد لله مازال بيننا الكثيرات على شاكلة تلك الحبوبة ....

 

[ummhind]

دوام الحال من المحال والحمد لله مازال بيننا الكثيرات على شاكلة تلك الحبوبة ....

مشكوووووووووووورة ام ريان على الصورة
التى تحمل كل الحنية و العطف و الحاجات الجميلة

و زمن الحبوبات ده موجود ما انتهى

 

[عائشة الفاتح]

لسة في حبوبات بيحملوا صفات الزمن الجميل . .
ربنا يحفظ لي حبوباتي أمي خديجة و أمي زهراء و أمي علوية . .

 

[ودريا]

شكرا جميلا احمد الحبر ، ام ريان ، ام هند ، عائشة الفاتح
حبوبه هذا الزمان بقيت منها الصورة وحتي الشلوخ صارت موضة قديمة ويا حليل زمن (يامولاي زوجة شلوخها تلاتة ) الان اصبحت سيدة الموقف (السادة اللميني )والغلبة لمن تمتلك اكثر الاصدقاء في صفحة الفيس بوك .
ام تي ان طبعا ماقصرت واصبحت الحبوبه مثقفة جدا وتعرف حتي اللغة الصينية وتتخاطب مع زوجه ابنها بها وترسل لها الآبري ونيهااو تحل محل عوافي وكيفنك لعلك طيبة .

 

[تماضر]

لا يوجد ما يمنع ان نواكب الحديث ونحتفظ باصالة القديم
ولّا الاتنين ما بجتمعوا؟

 

[ودريا]

لا يوجد ما يمنع ان نواكب الحديث ونحتفظ باصالة القديم
ولّا الاتنين ما بجتمعوا؟

شكرا تماضر
اعتقد انه لاتعارض بين استخدام الوسائل الحديثة لابراز مجموعه القيم والمثل السودانيه السمحة والتي تفضي بدورها الي بناء مجتمع المروءة والاخلاق الفاضله ، والانهتم بالقشور ونهمل المضمون والجوهر.

 

[عائشة الفاتح]

لا يوجد ما يمنع ان نواكب الحديث ونحتفظ باصالة القديم
ولّا الاتنين ما بجتمعوا؟

حأحكي ليكم قصة عن حبوبتي ربنا يديها العافية و يحفظها لينا :
قبل أسبوعين تلفوني باظ و شريحتي حرقت ( تلفت ) و كنت متأزمة من الوضع و في عز أزمتي ديك حبوبتي جابت لي تلفونها و أدتني كرت و قالت لي هاك نزلي لي الكرت دا عايزة أتصل . . قلت ليها قلبتي علي المواجع :weeping:
ربنا يحفظها لينا سبب الإبتسامة و رمز الحنية . .

 

[فنجان السم]

[حبوبة الفيس تصاحب ناس تامر ووائل عليكم الله في حبوبة اسمها شيرين دي يعقلوها كيف

 

[محمد عبد المطلب محمد]

ودريا وكل الاخوة والاخوات
لقد فطن بعض رجالات التربية والتعليم لهذا الامر من سنوات عديدة لذا كانت بعض القصص والاحاجي مقررة في سنوات الدراسة الاولي حتي تظل عالقة بالذاكرة
وفطن العلامة عبد الله الطيب لهذا الامر فجمع مجموعة كبيرة من الاحاجي في كتابه (الاحاجي السودانية) وللعلم هذا الكتاب تمت ترجمة نصوصه للغة الانجليزية
مع خالص الود

 

[ودريا]

مشهد اول:
الحكومة : لوسمحت يافردة ادينا الريموت وممكن تتابع برنامجك في التلفزيون التاني في الصالون !
لانو انا وامي متابعين مسلسل فريحة ....
ومشهد آخر :
امي : سويت لي ملاح مفروكة عارفاك بتحبها غسل ايدك وتعال اكل .
يا دوب عرفت لماذا رهف تنادي هذه حبوبه
وتنادي تلك بي تيتا
انتوا صواج قصتوا شنو؟

 

[ودريا]

انتو وكتين تشيك بتحب صواج ؟ حبوبة دخلها شنو في الموضوع ده !!!!

 

[محمد عبد المطلب محمد]

تعرف حبوبة 1 وحبوبة2
عاملين ذي القطية حقتك دي
والبيت الوراها
الغريبة في طفايات حريق جمب القطية
بالجمبة.
وين عشاي
يكون في زيارة مع احمد الحبر

 

[ودريا]

تعرف حبوبة 1 وحبوبة2
عاملين ذي القطية حقتك دي
والبيت الوراها
الغريبة في طفايات حريق جمب القطية
بالجمبة.
وين عشاي
يكون في زيارة مع احمد الحبر

اولا لي شرف حضور مشاركتك في القرن الاربعين ....
وحبوبة القطيه يا عجب عينيه بسحروك ليا ...
الطفايات دي عندنا ذي الهواء البنتنفسوا تفتح التلاجة تلقي فيها طفاية ....
ود عشاي قول ليهو ما تتعب سااي الراجل ده حرموا عليهو الكمبيوتر تب عشان تاني تقولي ابوعشر ولا ابو خليل .
بالجمبة :
رجال التابا...

 

[محمد جعفر]

بوست جميل جداً يا ود ريا ..
مهما تغيرت الازمنة والعادات تظل الحبوبة هي الركيزة الاساسية في كل بيت وتظل فى الوسط السودانى الحكمة والمحبة والالفة وصلة الرحم التى لا تنقطع بين الاهل وذلك لانها الكبيرة.. وكبر سنها يجعلها المعين الذى لا ينضب ودائماً ما يرتشف جميع أفراد الاسرة منه كل حسب تقربه اليها.. توصي الحبوبة دائماً بالتواصل والمراحمة بكل ما تعني هذه المفردات من شمولية.. وتقول الحبوبة دائماً انها تحب أحفادها أكثر من أولادها وكما يقول المثل العامى ( أغلى الولد ولد الولد ) وهذه الحقيقة لا يمكن للنساء فك شفرتها إلا ان يصلن الى سنها .. وبعد أن يصلن سيدركن حقيقة هذا الاحساس ..

ونسأل الله تعالى ان يحفظ جميع الحبوبات الأحياء منهن ويطول لنا في اعمارهن وان ويرحم الأموات منهن رحمة واسعة ويجمعنا بهن في جنات النعيم .. آمين

لكم التحية

 

[ودريا]

مشكور اخي محمد جعفر
ويا زمن الحجا في بيت الحبوبة وشحدت سفة السكر ..وزمن عطاء الحبوبات ودفع الريالات من طرف التوب والمصرور ومجدوع فوق الضهرالوضع الذي يجعله في احيان كثيرة عرضة حتى للنهب اذا ما تعذرت الهبات.
ولكن لازلنا في السودان متمسكين بعاداتنا الاصيلة التي تحترم الصغير والكبير مما جعلنا نهتم بالحبوبة السودانية اهتماما كبيرا دون ان نلقي بها في دار العجزة والمسنيين كما تقوم بها دول العالم الاخري.
وهذا دليل علي ان الاسر السودانية متمسكة بعاداتها دون التخلي عن ماورثتها من الاباء والاجداد

 

[محمد جعفر]

ويا زمن الحجا في بيت الحبوبة وشحدت سفة السكر ..وزمن عطاء الحبوبات ودفع الريالات من طرف التوب والمصرور ومجدوع فوق الضهرالوضع الذي يجعله في احيان كثيرة عرضة حتى للنهب اذا ما تعذرت الهبات.

نتحسر جداً لاننا لم نلحق بتلك الحُقبة من الزمن .. وشكلنا كدا جينا في الزمن الضائع :a26:

ولكن لازلنا في السودان متمسكين بعاداتنا الاصيلة التي تحترم الصغير والكبير مما جعلنا نهتم بالحبوبة السودانية اهتماما كبيرا دون ان نلقي بها في دار العجزة والمسنيين كما تقوم بها دول العالم الاخري.
وهذا دليل علي ان الاسر السودانية متمسكة بعاداتها دون التخلي عن ماورثتها من الاباء والاجداد

الترابط والحميمية بين ابناء الاسرة هو ما يميزنا عن بقية الجنسيات والشعوب .. والحمدلله الذي جعلنا محافظين لهذه العادات والتقاليد ..
لك الشكر والتقدير مرة أُخرى على موضوعك الجميل