@ ونسة حبوبات@

[ummhind]

السلام عليكم ورحمة الله تعالى و بركاته​

كو.... كو..... كو​

ها اجنة افتح باب النص ده الليلة صنّجتُه كَدِى مالك​

جون:يا هاجة تاهرة انتَ ما تجى بباب قدام​

حاجة طاهرة:ها اجنة داك باب الرجال كيفن اجى داخلة بيه
افتحو لى عليك الله​

---------​

حبابك آجون و معاك الوليد صلاح ​

شن نفرو ما بدورو تفتحو لى​

باب النص ده ​

عمره ما قفلتو الليلة الجاكم اختاكم​

جون: يا هاجة ولد صغير ده بتلع فى شارع​

وغنامية بتاع جيران ده جننا كل دقيقة يدخل​

حاجة طاهرة: اى بصِّحْ دخّلو لى امو جوه
و خلاس اقفل منو الباب​

ها صلاح امش امسك اخوك الصغير ما يطلع ​

دحين امك فى ؟​

صلاح: اى امى قاعدة فى المطبخ ادتنى قشر البطيخ ده​

اودى لى غنماية الجيران......​

--------​

صلاح: حبوبة طاهرة الليلة فريق الكورة حقنا فاز​

وشلنا الكاس​

هىيا يابا جيت لى أ صلاح أولدى ان شاء الله يا ود حشاى
ديمة شايل الكاس​

و تفوز دنيا و أخرة ماك لعّاب اتَ فى الكورة صلاة النبى عليك​

--------​

الليلة وينا حبوبتك السرة و اخلاس(اخلاص)
ما بشوفها على التُكل​

جون : هاجة ده بسلى (تصلى) و اكلاس فى مطبخ​

حاجة طاهرة : حاجة السرة يا حليلا
صلاة الضحى اصلا عاد ما بتفتوتها ​

ان شاء الله نصليا سوا فى الحرم​

سلام عليكن اهل الدار​

سلام الله عليكن الليلة قهوتكن دى تجيب الضهبان ​

آجى بصح اخلاس على التكل ​

الليلة شدرة النيمة دى ضلها بارداً ​

النجر البنبر ده و اصنقر... ​

ها آجنة نادى لينا سلوى دى من بيتها قلها حاجة طاهرة قالتلك جيبى الجبنة تحت ضل النيمة وحات الله بااااااااااااااااااااردن​

إت آخلاص جبنتك بصح متل جبنة سلوى​

بن حبش مو ياه بنهم سمح خلاس​

--------​

حاجة السرة : حبابك اطاهرة اصبحتى كيفنك من وجع الركبين​

نعل ما تعبتى​

حاجة طاهرة: و الله نحمده و نشكره مسحتهن
بالدهان الجابو لى ولدى ​

والله بالحيل سمح نفعنى......​

شفتى المطرة الشالت امس دى برقها عبادى​

علا ما صبت​

حاجة السرة : اسه كدى انبطحى فى العنقريب
قعاد البنمبر دا بوجع ليك ركبيك......​

هى لكن الهبوب الجات بتخليا تصب​

فرقتا كولها يمين شمال ​

حاجة طاهرة : هىّ الحمد لى الله الما صبت
كان خربت على ناس التاية​

عقد بت بتها باكر​

اسه جَيتى دى من التاية مشيت اباركلا ختوبة(خطوبة) بت بتها​

قالوا ختبها ود محاسن الماخدها التوم ود مُحمّد​

قالو جا من السعودية يشيل الفاتحة مع ابوها على عمها المات فى رمضان​

اها اظنها عجبته البنية و اتشبّك قال الا اعقد اسه​

جا جاهز للعرس يا بت امى...​

اها باكر جايين الرجال للعقد
و العرس فى عيد الضحية عاد عيد الضحية مو قرّب.​

ضحكتنى بت كلتوم الممسوخة قالت لى حبوبتها ما عندنا زول مات إجينا مغترب يشيل الفاتحة......​

حبوبتها قالتلا يموت حيلك مالك كاتلانا فوق درب العرس....​

حاجة السرة تضحك: بت كلتوم مى ممسوخة من يوما الله يقرّب سعدا و يعرس ليا متل البنيات​

......​

نتابع​

​

​

​

​

​

​

​

 

[ummhind]

و الله عجبنى وسرَّ بالى للتاية لى بنية بتها نهلة اريتها بت الهنا
العديلة
​

مما ماتت امها حبوبتها ربتها تربية صاح​

حاجة طاهرة: و هوعاد اريته سعد البنيات لحدهن ​

ما خلو شئ ما جايبينوا ليها
​

والله وكِت ام العريس ورتنا حاجات الشيلة دى​

الما تشَهّد منه مخيّر الله شئ مو شئ.....
​

وعاد البنية تستاهل الرايقة المادبة المهذبة​

النضيفة المرتبة المنظمة و متعلمة و متدينة كمان....
​

و الله بختوا ود التوم امه دعت ليو..
​

و فوق ده كل ايدا طاعمتن البنية​

تلقيا واقفة فوق المطبخ البتجيبوا ليك كل سمح و طاعم ​

حاجة السرة: اى بصح صدقتى داك اليوم ود بتى مشى لي اخوها
​

قالو جاء من السفر و عزم اصحابو كولهم عشا
​

و الله الجنة ده وكت جانا راجع​

قال اخته دى عملتلها عشا فى الفنادق مافى​

يمين قال جابتلها اصناف ما شافوها فى حياتم​

شئ ملفوف و شئ مدور و شئ قايم شئ قاعد​

حيرت الجنيات ديل لحدهم
​

و العجب التحليات و الله قال حاجات
ما عرفوا ياكلوها كيفن ذاتو​

الله يغتيها البنية من الحاسدين و الراصدين...​

----------------
​

حاجة طاهرة: اى صدقتِ و الله بت بتى قالت طوالى فاتحة
قناة اللكِل( الاكل)
​

البجيبو فيها مرتن كدى بقولولا بت العالم(منال العالم) ​

سامعة البنيات بقولن اسمها كدى
​

قالن بتجيب اكل سمح​

حاجة طاهرة: اى بصح صدقتى​

وفوق ده كلو بتريد الميز بالحيل....
​

البت مما تخشى البيت تلقى ايدا فى النضافة ​

ان ملحت ليك فى الواطة دى تاكلى. ​

حاجة السرة: البنية مى جبدتا المرحومة امها عاد
​

امها عاد كانت مرة و النسوان ورا.....
​

و كمان مما ما ماتت امها شايلة حبوبتها التاية فوق عينيا ...
​

البت وكِت تناديها حبوبتا قَبال ما تم اسمها بتلاقيا فى وشا....
​

حاجة طاهرة: أى والله بصح
وفوق ده كمان عليها سماحة خلقة و اخلاق ​

البنية رايقة روقة​

البنيات كلهن بدورن ابقن زيها ​

متل ما قال ود الرضى:
​

ان مشت عديـلة و ان وقفت قدالــــــــــة ​

و ان جلست معاهن اتفاولن بى حالـــها​

الذوق و الادب عارفنه شن ببقالـــــــــها ​

واحد عمها وواحد محقق خالـــــــــــــها​

----------
​

حاجة السرة: اى والله بصح صدق ود الرضى​

التقول قاطع شعره ليا هى بس​

عاد حبوبتها مِى التاية​

-----------------

نتابع​

 

[ummhind]

اخلاص: إتِ عارفة يمة قالو كان بدورا ود الصادق ​

الفى اميركا​

حاجة السرة: هى امريكا تطير فى السماء ​

المشى كله ما جاء راجع بلدا بعيدا بُعد​

تذاكرا ساى تبنى ليها بيت​

وهو عليك الله الخواجات ديل طردناهم من بلدنا نودى ليهم بنياتنا ​

اخير ليا السعودية دى مالها بلد النبى عليه الصلاة و السلام​

حاجة طاهرة: ود الصادق ذاتوا كان سمع كلامى​

اللى يجى يغترب فى السعودية دى مالها​

يمين ان طول في بلد النصارى دى يجيبا لينا خواجية ترطن​

حاجة السرة: كبى فنجان البركة آ طاهرة ​

الليلة الجبنة سمحة تب البن ريحته طاقة​

ناولينى التمرات ديل آخلاس ( يا اخلاص)​

.......​

حاجة السرة: البنيات ديل حسهن عالى كدى مالن و اضاحكن​

هداهو صلاح جا...​

تعال آولدى تعال آعشاى ود حشاى​

امش على البنيات ديل الله يرضى عليك​

قولهِن حبوبتكن السرة قالتلكن​

حسكن ده ما يعلى​

الرجال قاعدين بى قدام فى الديوان​

الحس العالى ده ما بيرضوه​

دحين خلن حديسكن براحة و اضحكن بشويش​

حاجة طاهرة: قولهن امشن ساعدن ناس العرس​

باقى البنيات الصغار ديل كلهن لقيتن يخبزن و يرتبن و ينضفن​

ما خلن شئ عرس البنية ده جاهن مستعجل ​

.......​

حاجة السرة: اسه إخلاس بدّوُر تمش تقطع معاهن الفطير​

اتِ يا اخلاس وليدك الصغير بره شايفا الجنوبى ده يكورك معاو​

ولدك ابا يسمع الكلام خايف عليه ما يمرق الشارع​

اظنهن العربيات كتار داخلات على ناس التاية​

اخلاص: خلي صلاح امش يجيبو يُمه​

رسلته يودى قشر البطيخ لناس احلام ​

بجى اسه راجع​

حاجة طاهرة: هَىّ ما جا راجع الوليد عِلا السرة رسلته​

للبنيات ديل بجى اسه يدخَّله من الشارع​

حاجة السرة: خلى ذاته اللجيب خرطوش الموية ده
الملى الزير ده موية و معاو البرميل
امكن الموية دى تقطع علينا تحيرنا....

نتابع
--
--
--​

​

​

​

 

[ummhind]

هاداهو جاك راجع قال ليك البنيات اتكلمن​

فى النصيبة ده (لاب توب)​

مع خالتن فى السعودية ​

شن سموه يا وليدى ؟​

صلاح: اسمه الماسنجر يا حبوبة​

حاجة طاهرة: اى بصح اسمه مس الجن ​

دحين كلامى مو صاح مو مس جن الناس يصنقروا الليل و النهار​

فى الداهى ينضمو لامن يفترو الواحد ضهرو ينقصَّ​

حاجة السرة: إتِ فى ده و الا النصيبة الجابوا جديد (التلفزيون)​

بقى رهيييييييييييييييف ود اخلاس ده يشيلوا براو​

زمان حلاة مو تقيل يقِلّو اربعة رجال​

حاجة طاهرة : يمين بقى رهيف هو و اتندلو شحم هون​

الواحد تلقيو قاعد فوق كرسيو و امسك النصيبة البدوسوها دى​

المتِل المسدس ( الريموت كنترول)​

و يقعدو يلفو العالم ده كلو و هون متندلين فى كراسيون ديل​

حاجة السرة: و الله بصح صدقتى تب الدكتور داكِ اليوم​

فى الرادى قال الحركة سمحة بتقوى البدن​

دحين اسة الوليدات ديل ما تخربوا تب​

حاجة طاهرة: هو زمان كان بيجيبو فوقو السودان بس​

اسى يمين الدنيا كلها تشوفيا فوقو​

حاجة السرة : هَىّ يا يمة يتقّزوا فينا النهار كلو​

شى عربى و شئ افرنجى​

(كناية للغناء و الطرب الكثير)​

الباسطن شنو ما تعرفيو ​

الناس اتكاتلوا ورا و قدام​

اخبار عشرة دى فى الرداى الراجل داكِ الليلة​

رصّا ليو كترت جنيات ماتوا​

عدد ما ليهو حد ​

شن نفرو الناس تقعد تغنى و ترقص​

و يمين إلِليلنا ذاتو خِرِب (تلفزيون السودان)​

الجنيات جت عليون يغنوا و يرقصوا ​

ياحليل زمن الجاغريو وود الرضى​

عليك النبى ده مو اخر الزمن ​

إلليلنا كلو مشاتر​

و كمان الداهى الجابو جديد ده​

ود بتى قالى اسمه برى برى (بلاك برى)​

الواحد تلقِى مدنقر رقبته كدى أكان ناغمتى ما يجيب خبرك​

و فى شارع الله وحات الله بقوا مِتل المجانين​

كل واحد اتكلم براه بى جهة​

دحين مو جن كلكلى البسوو فوقو دا.....​

نتابع
--
--
--​

 

[ummhind]

حاجة طاهرة: هى امريكة الجن دى عملت النصايب دى كولها
​

​

​

من شان يصحلوا بلدن و يطوروا
​

​

علا ناسنا نحن الِليلُن كلو اشتر.​

​

هن البنيات ديل كان قعدن و عرفن البيفِدِن فوقو(يستفيدوا)
​

​

كانن بقن متل نهلة دى بت التاية
​

​

و الله قالولك متعلمة و فاهمة
​

​

القران ده حفظته من الداهى ده​

​

و كمان تعلّم فوق اختا قالتلا ولدك اهتمى بيه و خلى بالك منه​

​

قالت قرت حاجات مهمة فى تربية الجنيات من صغار​

​

قالتلا ولدك ان جا من المدرسة اعملى معاو الواجب​

​

واسعيلو و قعدى معاو و اعرفى اصحابو منه​

​

قالتلا اعمليا ساى متل الونسة ما تغفلى منو​

​

السنين اللولا دى مهمة​

​

و النصيبة ده (الموبايل) ما تخيلى فى يدو​

​

قالت خطر عليو فى سنو دى....​

​

و الله كلامها بالحليل سمح​

​

علا لاكن بعد العولمة دى كولها بنيانتا و ليداتنا​

​

بشوفون بسمعوا الكلام البنيات​

​

ماسكات ادبن و ما بعلن حسهن فى الشارع​

​

و الواحدة تمرق من بيتها محشمة......​

​

و الوليدات ما بقصروا فى الواجب​

​

الله يحفظ بنياتنا ووليداتنا​

​

---------​

نتابع​

--
--
--​

 

[ummhind]

حاجة السرة: تعال آولدى ناولنى الخدرة دى النورقها​

مزاجى تب ظبط مع شراب الجبنة دى​

و الله بصح البنية فاهمة و متعلمة​

الله يحفظ البنيات و الوليدات​

صلاح : حبوبة انت بتاكلى التسالى ​

حاجة السرة: و انا عندى ليهو سنون​

صلاح: خلاس امسكى لى كيس التسالى ده​

حاجة السرة: شوفو الجنة الممسوخ ده​

قُتْلو جيب الخُدرة النورقها جاب لى كيس تسالى​

اتاريه دايرنى امسكو ليو​

جنيات الزمن دا ممسوخين خلاس​

........​

اخوك الصغير جا شحدنى التسالى ​

قُتْلو مو هولك هول اخوك اديو معاك حبة تسالى.....​

صلاح: سمح سمح بديو يا حبوبة ​

حبوبة طاهرة​

اسمعى النكتة دى​

رباطابي بيضرب في باب البيت بوهية
جات جارتو قالت ليهو لاكن البوهية دي ما خفيفة؟
قال ليها يعنى انتى التقيلة​

حاجة طاهرة تضحك:​

والله لاكن ضحكتنى​

الله يجازى محنك سمعتها وين​

حاجة السرة : سمعها من صاحبو فى المدرسة​

مما جا حكاها لى امه من قبيل كاتِلا الضحك​

حاجة طاهرة تضحك: هىّ لاكن هىِ مى غبيانة ساعلاهو لِشنو​

مى عارفة الرباطاب مسيخين ​

عشان تانى تتشوبر اها سكتّا​

خشمها تانى ما بتفتحه​

حاجة السرة: هَىّ مى شلاقة منا ساى​

صلاح : حبوبة السرة و حبوبة طاهرة دى نكتة ساى ما كلام جد جد​

حاجة السرة: هو داكِ الليلة الجنة مو مبسوووووط ​

فريقم إلِليلْ الكورة قالو شال الكاس ​

ود عمر بشوفو مامشى معاك الكورة​

قالو اضَّرب فى ركْبتو​

ما بقى كويس دحين؟​

حاجة طاهرة: يا حليلو مالو اضربو شنو؟​

وحات الله سحرو ساى ادو عين الجنه اكان رسلوه الدكان ساى​

اجرى جرى التقول نفضتو هبوب ​

يا حليلو بريد الكورة​

حاجة السرة : آى بصح ولداً عديييييييييل ​

و بسمع الكلام سحرو ساى على امه​

صلاح: ضرب كراعو فى التمرين​

.......​

​

​

نتابع
--
--
--​

 

[ummhind]

حاجة السرة: تعال اصلاح آولدى​

امش على التُكل امك عملت ليك شربات ليمون اتَّ و اصحابك ​

الواليدات الكانو المعاك فى الكورة​

امش ناديهون يشربوا معاك​

و بعد ما تشربوا العصير سوقون امشو لناس التاية ساعدون​

باكر الرجال جايين للعقد​

غسلوا البراميل ختو فوقها البيبسى و جيبوا التلج كسروا ​

و ختوه فوق البراميل​

و املوا اللباريق وفرشوا برش الصلاة الكبير للرجال​

و نظموا معاهم​

الحاج بدور امش يصلى معاو المغرب​

باقى اخوك الكبير مشى قبيل هو و اصحابوا ياجروا الصيوان....​

اخو العروس بالحيل صاحبو​

بيدورو يساعدو و يقيفو معاو العقد جاهم مستعجل​

و اتَّ ذاتَك امش ساعد مع اخوك ما تقعد تعاين ساى​

حاجة طاهرة : اى بصح عرس البنية دى جاهِن مستعجل خلاس​

البنيات الصغار يكلمن فينى قالن لى دى دعوة مرة ( بترقيق الراء) ​

جاتِن فى البيت دعت ليها دعوة سمحة​

قالو ليك المرة غريبة قاعدة فى محطة البصات و النهار حار عليها​

لاقتا حاجة التاية قالتلا الرسول اكان ما دخلتى برّدى شوية اكلى​

ليك لقمة و اشربى موية و ريحى لامن تسمعى​

رزة الباص امرقى عليو​

و قالوا عاد المرة من فِرِدْ رسول مشت معاها ​

الحر كتلا يا حليلا....​

وكت دخلن على البيت لقوا البنية دى مِى نهلة منضفة الفجة ​

و ملمعة الترابيز و مفرشة الملايات الحوش مرشوش ​

و مقشوش و البيت ممسوح يلمع و الملايات ديل يهبهبن​

و نظام تمام ​

و عاد قالوا ليك احترمتا جنس احترام ​

جابتلا صينية الفطور الما خمج و العصير بالجك​

وفرشتلا المصلاية صلت و جابتلا الشاى ​

قالو اخواتا الصغار انقنقن قالن لى اختن ​

حبوبة جابت لينا المرة دى نحن عندنا امتحان باكر​

دايرين نقعد فى اللوضة دى نذاكر​

قالوا قالت ليهن اسكتن ما تتكلمن قدام الضيفة​

الكلام ده ما صاح منكن.....​

مسكت نظمت ليهن اللوضة التانية​

و دخّلتِن فيها حتِين هجسن و سكتن و قعدن شافن مذاكرتن..​

اها قالوليك المرة اخدتلها غمدة وكتين صحت​

و قالولا الساعة اتنين جات قالت اجى​

هَىّ الليلة لاكن ما مغربت علىّ​

شكرتن زييييييييييين و دعت ليهن كترت دعوات​

التاية و بت بتها مِى بَسطَنّا بالحيل​

وقالوليك وكتين جات مارقة على الباص ​

عجبتا البنية هى عاد مى واقفة فوقها تخدم فيها مما دخلت ....​

قالتلا شن سموك يا البنية قالتلا نهلة طوالى ​

عاد رفعت ايدينا فى السماء ​

و دعتْلها دعوات سمحات​

قالت​

يارب البيت الما بتقول ابيت نهلة بت التاية يجيها سعداً​

لا يلخولو العجين ​

ولا يلملمولو النساوين​

اها دحين مى ياها دعوتا اتحققت​

بت التاية سعدا سعد نُصاح​

الخِتُوبة يوم و العقد تانى يوم​

اريته سعد بنياتنا لحدهن​

................​

--​

--​

--​

--​

تمت​

---------------------​

واصلو اذا حبيتو تتمه اى مشهد كزيادة فى النص.....

امكن اجيكن صادة ان الله كتب لي عمر​

ودعتكن لى رب العباد ​

--​

--​

تفتكروا الحاجات الجميلة سوف تستمر​

الله يحفظ حبوباتنا و يبارك فى عمرهن​

و يرحم من مات منهن​

هذه القصة من نسج الخيال​

و الاسماء الموجودة فى هذه القصة​

اسماء وهمية اذا صادفت لشخص ما ​

فلم يكن مقصدى شخص بعينه​

فقط أشرت فيها الى بعض النقاط ​

التى تهم مجتمعنا الصغير داخل العيلفون​

أداب و معاملات و تكافل وتعاون​

واحترام وثقافة ​

بعض منها ذهب ​

اتمنى ان نحافظ على هذا الثراث الاخلاقى الذى تبقى​

.....​

بعض اللهجات الحوارية لم افلح فى كتابتها نصاً​

فاعذرونى​

اذا وجدت بعض الأخطآء​

--​

​

و السلام عليكم و رحمة الله تعالى و بركاته​

-----

 

[ummhind]

​

​

​

​

ان شاء الله ونسة حبوباتنا ​

نالت رضاكم زى ما اتكيفنا مع جبنة اختنا الفاضلة سلوى؟؟؟​

--​

--​

فى امان الله​

 

[ياسر عبدالرحمن خيري]

جزاك الله خير الجزاء أم هند...
ونسة (حَبُوبات) شِيّقة دفعتني للبحث حول هذه المُفْرَدة (حَبّوبة) أصلها ومعناها هل هِي من (التَحَبّب) ولَم تُطلق فقط على الجدات دون الجُدود؟

 

[حسن محمد]

والله حكاية جميلة جدا
ويبدو انها مرتجلة تدافعت عليها الصور والافكار والذكريات
اعجبتني (نشرة عشرة) و (صوت الباص) ولوكانت (رزة) لكانت اجمل وكذلك العصير لو استبدلتيه ب(شربات ليمون) او( جك ابري) و(الفجة ممسوحة ) توحي بعصر البلاط والسراميك ولو ادخلت صور الركوبة والزير وكو كو كو)غير (طق طق طق)
اعدت لنا صور من الطيبة والمحنة والتراحم والتوادد والتكافل
جزاك الله خيرا
نتمني مواصلة الونسة ونقل تلك الصور الناطقة بالمعاني والمقارنات والاشارات الذكية

 

[احمد الحبر]

صورة الواقع في الزمن الجميل .. وما أحلاه من زمن ..
يديك ألف عافية أم هند ..

 

[um rayan]

اللمة والونسة مع حاجة السرة وحاجة طاهرة سمحة بالحيل دحين سلوى وصلت ولا لسة كان بقت مطولة كبي لينا الجبنة عشان راسنا تقل وان شاء تجى قوام وتحصل معانا التني....................
جانب اخر نكتشفه في اختنا الفاضلة ام هند ابدعتِ وواصلى فنحن نتوق للمزيد من تلك الونسات....

 

[سلوى حسن جمبو]

اللمة والونسة مع حاجة السرة وحاجة طاهرة سمحة بالحيل دحين سلوى وصلت ولا لسة كان بقت مطولة كبي لينا الجبنة عشان راسنا تقل وان شاء تجى قوام وتحصل معانا التني....................
جانب اخر نكتشفه في اختنا الفاضلة ام هند ابدعتِ وواصلى فنحن نتوق للمزيد من تلك الونسات....

جيت جارية أول ما شميت ريحة البن والقلوة وسمعت صوت دق الفندك والتنتنة وشميت البخور


قلت أكيد الجلسة دى فيها ونسة حبوبات
وكتر خيرك يا ام هند خليتى لينا النفاج مفتوح وشلتى من قدامه الطوبات الكانت بتعتر لينا


اها يا ام ريان انا وصلت تب عاد لازم اشرب من البكرى دة

​

 

[ummhind]

جزاك الله خير الجزاء أم هند...
ونسة (حَبُوبات) شِيّقة دفعتني للبحث حول هذه المُفْرَدة (حَبّوبة) أصلها ومعناها هل هِي من (التَحَبّب) ولَم تُطلق فقط على الجدات دون الجُدود؟

جزاك الله خيرا الاخ الكريم ياسر خيرى
​

كلمة حبوبة لا اجد لها تعريف فى اللغة العربية



ككلمة مفردة​

و لكن نتميز بها نحن فى السودان عن غيرنا



من الذين يتحدثون العربية من الدول الاخرى
​

فاكثر تدولا فى الدول الاخرى كلمة (جدتى)


كما فى دول الخليج عموما


او (ستى) كما نسمعها عند المصريين


و الشوام و بالتحديد الفلسطينين​

اما كلمة حبوبة بالمعنى العام لدينا


فهو الحب و المحنة


و القُرب و التواصل للطفل منذ طفولته الاولى​

اما لماذا لا تطلق على الجدود ذلك و الله اعلم


ان الرجل السودانى بطبعه


صارم و حازم و كلمته دائما المسموعة فى البيت​

ليس معنى ذلك انه يفتقد صفة الحب و الحنان​

و لكن يترجمها بطرق اخرى اكثر صرامةً​

عكس الحبوبة التى دائما تضم الحفيد الى حضنها ​

و تدافع عنه اذا اخطأ و تتصرف خفاءا مع الحفيد​

اذا مُنع من شئ من قِبل والده هذا رأىّ الشخصى


و الله اعلم


وانتم ادرى منا فى اللغة العربية


نتمنى ان نسمع منك المزيد لكى نتعلم​

و اشكر لكَ مرورك الكريم​

 

[ummhind]

والله حكاية جميلة جدا
ويبدو انها مرتجلة تدافعت عليها الصور والافكار والذكريات
اعجبتني (نشرة عشرة) و (صوت الباص) ولوكانت (رزة) لكانت اجمل وكذلك العصير لو استبدلتيه ب(شربات ليمون) او( جك ابري) و(الفجة ممسوحة ) توحي بعصر البلاط والسراميك ولو ادخلت صور الركوبة والزير وكو كو كو)غير (طق طق طق)
اعدت لنا صور من الطيبة والمحنة والتراحم والتوادد والتكافل
جزاك الله خيرا
نتمني مواصلة الونسة ونقل تلك الصور الناطقة بالمعاني والمقارنات والاشارات الذكية

اشكرك جدا الاخ الفاضل حسن محمد​

على تنويرى بهذه النصوص التراثية التى جهلتها​

ربما النسيان و عدم تداولنا لها فى حديثنا العام مع الغير
فى هذه الحياة ( المودرن).....​

قمت باصلاحها قبل ان ارد عليك و على الاخرين​

شخصيا من الذين يحبون النقد البنَّاء​

الذى يدفع الاخرين الى الامام خصوصا لشخص مثلى ​

ما زال فى بداية الطريق فى كل شئ.....​

و منكم من امثالكم نستفيد و نتعلم​

---------------

و ربما كانت محاولة ارتجالية بالفعل فهى اول محاولة لى​

فى الكتابة اللهجة الدارجة و خصوصا لهجة الحبوبات​

لم اضف نص عن الراكوبة لانه ربما يؤدى الى حذف نصوص ​

اخرى و هى وجود اللاب توب و الموبايلات​

و التلفزيونات الحديثة فعهد الراكوبة لم تكن موجودة​

فهذه النصوص التى ذكرتها مهمة لانى قصدت فيها الاشارة ​

لاشياء اخرى مستحدثة يجب علينا ان نتعامل معها بحكمة​

-------------

فعهد الحبوبات ​

لا شك انه عهد جميل اتمنى ان تبقى تلك العادات​

و ان نحافظ على تراثنا الاخلاقى الكريم​

الذى يتناسب مع نهج نبينا محمد صلى الله عليه و سلم​

بارك الله فيك​

و اشكرك مرة اخرى لمرورك الطيب​

و اضافتك الجميلة​

--​

--​

 

[ummhind]

صورة الواقع في الزمن الجميل .. وما أحلاه من زمن ..
يديك ألف عافية أم هند ..

الاخ الفاضل احمد الحبر​

اشكر لك ردك الكريم و مرورك المشجع دائما​

و فعلا ما احلاه من زمن​

اتمنى ان يعود ما اندثر منه و ان نحافظ على الذى تبقى​

شكرا لمرورك الكريم اذى زاد صفحتى القاً​

بارك الله فيك
--
--
--


​

​

​

​

 

[ummhind]

اللمة والونسة مع حاجة السرة وحاجة طاهرة سمحة بالحيل دحين سلوى وصلت ولا لسة كان بقت مطولة كبي لينا الجبنة عشان راسنا تقل وان شاء تجى قوام وتحصل معانا التني....................
جانب اخر نكتشفه في اختنا الفاضلة ام هند ابدعتِ وواصلى فنحن نتوق للمزيد من تلك الونسات....

ام ريان الغالية​

اشكرك على هذا الاطراء الذى اعتقد انى لست من اهله​

فانتم اهل الابداع و الروعة ​

وجودكم فى هذا الصرح هو الذى شجعنى على الدخول​

و اكون تلميذة تحت مدرستكم العامرة بكل ما هو جديد​

و ما زلت اتعلم منكم​

------------​

(سلوى بشوفا بالحيل جات جايبا جبنتها معاها كمان​

شوفى طقمها ده سمح كيفنّه حيرتنا فى العدة​

بتجيب فوقا من وين ما عارفة دحين ورينى اكان عرفتى... ​

بالحيل بريد عِدة التُكل ...إن مشيت مع الحاج السوق ساى​

و رحت منو​

إلقانى مِحِل العدة...... إياها عاد مِى شغلتنا)​

----------------

على فكرة يا ام ريان اول مرة اكتب باللهجة العامية​

و بالذات لهجة الحبوبات قلت اجرب ​

(اها لقيتونى بنفع و الا انسحب؟)​

----------​

اشكر لك مرورك و تشجيعك الدائم اختى الفاضلة ام ريان​

دمتى بخير و عافية و سرور​

--​

--​

--​

 

[ummhind]

جيت جارية أول ما شميت ريحة البن والقلوة وسمعت صوت دق الفندك والتنتنة وشميت البخور ​

قلت أكيد الجلسة دى فيها ونسة حبوبات
وكتر خيرك يا ام هند خليتى لينا النفاج مفتوح وشلتى من قدامه الطوبات الكانت بتعتر لينا​

اها يا ام ريان انا وصلت تب عاد لازم اشرب من البكرى دة ​

​

الغالية سلوى



حباب الجابك



و مشكورة على الجبنة و عدتا السمحة



و كمان جاهزة مكبوبة و ريحتها تجيب الضهبان



و باب النفاج مفتوح ما بتقفل تب تانى ....



اها انا جبت حبة حلويات كدى

عشان قعدة الجبنة دى تحلى



اصلا حلوة بى ناسا اتفضلوا كلكم معزومين



عملتهم صينيتين واحد لينا



وواحدة إلِليلة الرجال
خلى الوليد يوديها على الديوان


يلا اتفضلو




​

الف شكر الاخت الفاضلة سلوى على المرور الطيب



و الضيافة الراقية



تسلمى




و شكرى و احترامى و تقديرى لكم جميعا​

فى امان الله

--
--
--
​

 

[صديق حسن الأمين]

الونسة طيبة تب ، الننجم ونجيكم بالمهل .

 

[مصطفى محمد زين (جمّاع)]

​

​

​

أبدعتى أم هند فى هذا السرد الشيق بهذه اللونية المحببة للنفس والتى تربطنا بالماضى الجميل حيث الود والصفاء والإلفة والمحبة الصادقة دون رياء والعفوية فى العلاقات الاجتماعية (يبدو أنك تربية حبوبات :a26 ليتك واصلتى فى مسرح اخر ومشهد اخر وبنفس الاسلوب الدرامى الحى وهذه اللونية والتى بدأت تتلاشى وتنزوى مع بزوق فجر العولمة والتى قضت على كل جميل وأصيل وعفوى .فأصبحت الكلمات المرتبة والمنمقة والمتكلفة هى السائدة بين الناس جاهلهم ومتعلمهم حتى أضحت نوعاً من المظاهر فإصبحت فارغة من مضمونها لالون لها ولاطعم ولارائحة .
هانحن نتباكى على الماضى الجميل ونعيش على زكرياته كما تباكى قبلنا الشاعر عبيد عبد الرحمن على ماضيه حين قال:
​

حـليل الــماضى وأيامه حـليل الــرونق الــعَامـر
حليل زمن الحبيب طائع حليل زمن الحبيب آمـر
زمـَّنا الكـُنا لانـدرى بما كــان الــزمن ضــــامر​

بارك الله فيك